尋晚叱咤頒獎禮嘅結果，成為咗2021年第1單全港熱話。由「全民造星」塑造出來的一粒星姜濤奪得「我最喜愛男歌手」及「我最喜愛歌曲」兩大獎，大家喺 social media 熱烈廣泛地討論。無論係正面還是反面，都證明咗一件事：世界一直在變。
還記得我仲喺學生哥年代，樂壇有 4 個頒獎禮 (叱咤、十大中文金曲、新城勁爆及勁歌總選)，個陣同輩間嘅偶像唔係陳慧琳楊千嬅，就係古巨基陳奕迅，個陣我父母仲覺得唔合理，認為張國榮羅文攞獎先叫當之無愧。時至今日，姜濤、MIRROR攞獎，有人覺得唔服，有人認為香港樂壇已死等等。但毫無疑問，佢地係由民意一人一票選出黎，如果你有呢個黑人問號，其實要諗下自己：
「你同個世界係咪脫咗節？」
換個角度睇，如果你工作上，處事風格或做生意視野同習慣都一成不變，就等於今日頒獎禮上，你仍然認為得獎嘅應該係陳奕迅容祖兒一樣。得罪講句，當而家個世代覺得偶像係姜濤同MIRROR時，你仲係拒絕去了解箇中原因的話，你已經不經不覺間成為咗自己眼中嘅長輩。世界正在轉變，永遠不可能一直處於同一個 generation 裡，需要不停學習接受新知識、新事物，譬如公司有年輕的提議用 Slack 來取代 email 時，在耍手擰頭前不妨一試；又或是開始用 iPad 取代傳統紙張文件。又或者咁講，當你生活上願意接受新事物時，在工作範疇的視野都會開始有分別，例如你搵代言人，你未必再係諗自己年代所認識的偶像，可能 Youtuber、「全民造星」呢一班新人都會係你個 list 裡面。一個時代的開始，係需要有新血先可以繼續落去；就正如一間公司，需要營運下去都要靠新加入的年青人才可成功，你唔接受世界變，故步自封又點會有進步？
P.S. 姜濤唱 live 嘅唱功，同發表感想時個種率真同 humble，21歲仔黎講我好收貨！
#MrBusiness #姜濤 #叱咤頒獎禮2021
Search